‘‘เตน เมตาทิโส วณฺโณ…เป.… วณฺโณ จ เม สพฺพทิสา ปภาสตี’’ติฯ
วนฺทนวิมานํ เอกาทสมํฯ
12. รชฺชุมาลาวิมานวตฺถุ
[826]
‘‘อภิกฺกนฺเตน วณฺเณน, ยา ตฺวํ ติฏฺฐสิ เทวเต;
หตฺถปาเท จ วิคฺคยฺห, นจฺจสิ สุปฺปวาทิเตฯ
[827]
‘‘ตสฺสา เต นจฺจมานาย, องฺคมงฺเคหิ สพฺพโส;
ทิพฺพา สทฺทา นิจฺฉรนฺติ, สวนียา มโนรมาฯ
[828]
‘‘ตสฺสา เต นจฺจมานาย, องฺคมงฺเคหิ สพฺพโส;
ทิพฺพา คนฺธา ปวายนฺติ, สุจิคนฺธา มโนรมาฯ
[829]
‘‘วิวตฺตมานา กาเยน, ยา เวณีสุ ปิฬนฺธนา;
เตสํ สุยฺยติ นิคฺโฆโส, ตุริเย ปญฺจงฺคิเก ยถาฯ
[830]
‘‘วฏํสกา วาตธุตา, วาเตน สมฺปกมฺปิตา;
เตสํ สุยฺยติ นิคฺโฆโส, ตุริเย ปญฺจงฺคิเก ยถาฯ
[831]
‘‘ยาปิ เต สิรสฺมิํ มาลา, สุจิคนฺธา มโนรมา;
วาติ คนฺโธ ทิสา สพฺพา, รุกฺโข มญฺชูสโก ยถาฯ
[832]
‘‘ฆายเส ตํ สุจิคนฺธํ, รูปํ ปสฺสสิ อมานุสํ;
เทวเต ปุจฺฉิตาจิกฺข, กิสฺส กมฺมสฺสิทํ ผล’’นฺติฯ
[833]
‘‘ทาสี อหํ ปุเร อาสิํ, คยายํ พฺราหฺมณสฺสหํ;
อปฺปปุญฺญา อลกฺขิกา, รชฺชุมาลาติ มํ วิทุํ [วิทู (สฺยา. ปี. ก.)]ฯ
[834]
‘‘อกฺโกสานํ วธานญฺจ, ตชฺชนาย จ อุคฺคตา [อุกฺกตา (สี. สฺยา.)];
กุฏํ คเหตฺวา นิกฺขมฺม, อคญฺฉิํ [อาคจฺฉิํ (สฺยา. ก.), อคจฺฉิํ (ปี.), คจฺฉิํ (สี.)] อุทหาริยา [อุทกหาริยา (สี.)]ฯ
[835]
‘‘วิปเถ กุฏํ นิกฺขิปิตฺวา, วนสณฺฑํ อุปาคมิํ;
อิเธวาหํ มริสฺสามิ, โก อตฺโถ [กฺวตฺโถสิ (ก.), กีวตฺโถปิ (สฺยา.)] ชีวิเตน เมฯ
[836]
‘‘ทฬฺหํ ปาสํ กริตฺวาน, อาสุมฺภิตฺวาน ปาทเป;
ตโต ทิสา วิโลเกสิํ,โก นุ โข วนมสฺสิโตฯ
[837]
‘‘ตตฺถทฺทสาสิํ สมฺพุทฺธํ, สพฺพโลกหิตํ มุนิํ;
นิสินฺนํ รุกฺขมูลสฺมิํ, ฌายนฺตํ อกุโตภยํฯ
[838]
‘‘ตสฺสา เม อหุ สํเวโค, อพฺภุโต โลมหํสโน;
โก นุ โข วนมสฺสิโต, มนุสฺโส อุทาหุ เทวตาฯ
[839]
‘‘ปาสาทิกํ ปสาทนียํ, วนา นิพฺพนมาคตํ;
ทิสฺวา มโน เม ปสีทิ, นายํ ยาทิสกีทิโสฯ
[840]
‘‘คุตฺตินฺทฺริโย ฌานรโต, อพหิคฺคตมานโส;
หิโต สพฺพสฺส โลกสฺส, พุทฺโธ อยํ [โสยํ (สี.)] ภวิสฺสติฯ
[841]
‘‘ภยเภรโว ทุราสโท, สีโหว คุหมสฺสิโต;
ทุลฺลภายํ ทสฺสนาย, ปุปฺผํ โอทุมฺพรํ ยถาฯ
[842]
‘‘โส มํ มุทูหิ วาจาหิ, อาลปิตฺวา ตถาคโต;
รชฺชุมาเลติ มํโวจ, สรณํ คจฺฉ ตถาคตํฯ
[843]
‘‘ตาหํ คิรํ สุณิตฺวาน, เนลํ อตฺถวติํ สุจิํ;
สณฺหํ มุทุญฺจ วคฺคุญฺจ, สพฺพโสกาปนูทนํฯ
[844]
‘‘กลฺลจิตฺตญฺจ มํ ญตฺวา, ปสนฺนํ สุทฺธมานสํ;
หิโต สพฺพสฺส โลกสฺส, อนุสาสิ ตถาคโตฯ
[845]
‘‘อิทํ ทุกฺขนฺติ มํโวจ, อยํ ทุกฺขสฺส สมฺภโว;
ทุกฺข [อยํ (สี. สฺยา. ปี.)] นิโรโธ มคฺโค จ [ทุกฺขนิโรโธ จ (สฺยา.)], อญฺชโส อมโตคโธฯ
[846]
‘‘อนุกมฺปกสฺส กุสลสฺส, โอวาทมฺหิ อหํ ฐิตา;
อชฺฌคา อมตํ สนฺติํ, นิพฺพานํ ปทมจฺจุตํฯ
[847]
‘‘สาหํ อวฏฺฐิตาเปมา, ทสฺสเน อวิกมฺปินี;
มูลชาตาย สทฺธาย, ธีตา พุทฺธสฺส โอรสาฯ
[848]
‘‘สาหํ รมามิ กีฬามิ, โมทามิ อกุโตภยา;
ทิพฺพมาลํ ธารยามิ, ปิวามิ มธุมทฺทวํฯ
[849]
‘‘สฏฺฐิตุริยสหสฺสานิ, ปฏิโพธํ กโรนฺติ เม;
อาฬมฺโพ คคฺคโร ภีโม, สาธุวาที จ สํสโยฯ
[850]
‘‘โปกฺขโร จ สุผสฺโส จ, วีณาโมกฺขา จ นาริโย;
นนฺทา เจว สุนนฺทา จ, โสณทินฺนา สุจิมฺหิตาฯ
[851]
‘‘อลมฺพุสา มิสฺสเกสี จ, ปุณฺฑรีกาติทารุณี [… ติจารุณี (สี.)];
เอณีผสฺสา สุผสฺสา [สุปสฺสา (สฺยา. ปี. ก.)] จ, สุภทฺทา [สํภทฺทา (ก.)] มุทุวาทินีฯ
[852]
‘‘เอตา จญฺญา จ เสยฺยาเส, อจฺฉรานํ ปโพธิกา;
ตา มํ กาเลนุปาคนฺตฺวา, อภิภาสนฺติ เทวตาฯ
[853]
‘‘หนฺท นจฺจาม คายาม, หนฺท ตํ รมยามเส;
นยิทํ อกตปุญฺญานํ, กตปุญฺญานเมวิทํฯ
[854]
‘‘อโสกํ นนฺทนํ รมฺมํ, ติทสานํ มหาวนํ;
สุขํ อกตปุญฺญานํ, อิธ นตฺถิ ปรตฺถ จฯ
[855]
‘‘สุขญฺจ กตปุญฺญานํ, อิธ เจว ปรตฺถ จ;
เตสํ สหพฺยกามานํ, กตฺตพฺพํ กุสลํ พหุํ;
กตปุญฺญา หิ โมทนฺติ, สคฺเค โภคสมงฺคิโนฯ
[856]
‘‘พหูนํ วต อตฺถาย, อุปฺปชฺชนฺติ ตถาคตา;
ทกฺขิเณยฺยา มนุสฺสานํ, ปุญฺญเขตฺตานมากรา;
ยตฺถ การํ กริตฺวาน, สคฺเค โมทนฺติ ทายกา’’ติฯ
รชฺชุมาลาวิมานํ ทฺวาทสมํฯ
มญฺชิฏฺฐกวคฺโค จตุตฺโถ นิฏฺฐิโตฯ
ตสฺสุทฺทานํ –
มญฺชิฏฺฐา ปภสฺสรา นาคา, อโลมากญฺชิกทายิกา;
วิหารจตุริตฺถมฺพา, ปีตา อุจฺฉุวนฺทนรชฺชุมาลา จ;
วคฺโค เตน ปวุจฺจตีติฯ
อิตฺถิวิมานํ สมตฺตํฯ
2. ปุริสวิมานํ
5. มหารถวคฺโค